اسلام آباد (ڈیجیٹل پوسٹ) بھارہ کہو اور گرد و نواح میں سی ڈی اے کی جانب سے نوٹس جاری، مکینوں میں تشویش کی لہر

اسلام آباد (ڈیجیٹل پوسٹ) بھارہ کہو اور گرد و نواح میں سی ڈی اے کی جانب سے نوٹس جاری، مکینوں میں تشویش کی لہر
مصدقہ ذرائع کے مطابق بھارہ کہو، کوٹ ہتھیال، جمعہ بازار، جنجوعہ ٹاؤن، نیو منگیال، سبحان منڈلہ اور ملحقہ علاقوں میں کیپیٹل ڈیولپمنٹ اتھارٹی (سی ڈی اے) کی جانب سے نوٹسز جاری کیے جانا شروع ہو گئے ہیں۔ ان نوٹسز کے ذریعے مقامی آبادی کو مطلع کیا گیا ہے کہ مذکورہ علاقے سی ڈی اے کی ملکیتی زمین پر واقع ہیں۔
ذرائع کا کہنا ہے کہ سی ڈی اے کی پالیسی کے تحت ان علاقوں میں موجود مکانات اور تعمیرات کے عوض متاثرہ افراد کو 1300 روپے فی مربع فٹ کے حساب سے ادائیگی کی جائے گی۔ تاہم جن افراد کو سی ڈی اے کی زمین پر غیر قانونی قابض قرار دیا گیا ہے، انہیں دو دن کے اندر اندر جگہ خالی کرنے کی ہدایت دی گئی ہے۔
نوٹسز کے اجرا کے بعد مقامی آبادی میں شدید تشویش پائی جا رہی ہے۔ مکینوں کا مؤقف ہے کہ وہ کئی برسوں سے ان علاقوں میں آباد ہیں، بعض افراد کے پاس بجلی، گیس اور پانی کے کنکشنز بھی موجود ہیں، اس لیے انہیں اچانک بے دخل کرنا ناانصافی کے مترادف ہے۔