اسلام آباد (ڈیجیٹل پوسٹ) پاکستان منرلز انویسٹمنٹ فورم 2026‘ کا آغاز: معاشی انقلاب کی نئی صبح

اسلام آباد (ڈیجیٹل پوسٹ) پاکستان منرلز انویسٹمنٹ فورم 2026‘ کا آغاز ہو گیا، دو روزہ بین الاقوامی کانفرنس اسلام آباد کے جناح کنونشن سینٹر میں 60 سے زائد ممالک کے نمائندے، سفارت کار، عالمی مالیاتی اداروں اور کان کنی کی بین الاقوامی کمپنیوں سے وابستہ سرمایہ کار شریک ہیں۔

قدرت نے سرزمینِ پاکستان کو جس جغرافیائی اہمیت اور قدرتی وسائل سے نوازا ہے، وہ دنیا کے بہت کم خطوں کے حصے میں آئے ہیں۔ شمال میں فلک بوس برف پوش پہاڑی سلسلوں، قراقرم، ہمالیہ اور ہندوکش سے لے کر جنوب میں بلوچستان کے لق و دق صحراؤں اور ساحلِ مکران تک، اس دھرتی کے سینے میں اربوں بلکہ کھربوں ڈالر مالیت کے معدنی خزانے صدیوں سے پوشیدہ ہیں۔ بدقسمتی سے ماضی میں پالیسیوں کے عدم تسلسل، جدید ٹیکنالوجی کے فقدان، پیچیدہ بیوروکریٹک رکاوٹوں اور سکیورٹی خدشات کے باعث ہم ان بے پناہ وسائل سے خاطر خواہ فائدہ نہیں اٹھا سکے۔ تاہم، اب وقت کا پہیہ بدلتا ہوا دکھائی دے رہا ہے۔ وفاقی دارالحکومت اسلام آباد کے جناح کنونشن سینٹر میں منعقد ہونے والا دو روزہ “پاکستان منرلز انویسٹمنٹ فورم 2026” (PMIF26) اس امر کا واضح اعلان ہے کہ پاکستان اب محض قرضوں اور امداد کے سہارے چلنے کے بجائے اپنے قدرتی وسائل کو بروئے کار لا کر معاشی خود انحصاری کی منزل طے کرنے کے لیے پرعزم ہے۔

“پاکستان: اہم معدنیات کی اگلی منزل” (Pakistan: The Next Critical Minerals Destination) کے عنوان سے منعقد ہونے والے اس عالمی فورم نے دنیا بھر کے سرمایہ کاروں، کان کنی کی بڑی ملٹی نیشنل کمپنیوں، مالیاتی اداروں اور پالیسی سازوں کی توجہ اپنی جانب مبذول کر لی ہے۔ 60 سے زائد ممالک کے مندوبین، سفارت کاروں اور عالمی ماہرین کی اس فورم میں شرکت اس بات کا ثبوت ہے کہ بین الاقوامی برادری اب پاکستان کو معدنیات کی عالمی سپلائی چین میں ایک کلیدی کھلاڑی کے طور پر دیکھ رہی ہے۔ اکیسویں صدی کی عالمی معیشت اور ٹیکنالوجی ایک بڑی تبدیلی سے گزر رہی ہے۔ دنیا تیزی سے فوسل فیول (تیل اور گیس) سے ہٹ کر صاف توانائی (Clean Energy)، الیکٹرک گاڑیوں، سولر پینلز، ونڈ ٹربائنز اور مصنوعی ذہانت (AI) کے دور میں داخل ہو چکی ہے۔ اس سبز انقلاب اور جدید ٹیکنالوجی کا تمام تر دارومدار جن دھاتوں اور معدنیات پر ہے، انہیں عالمی اصطلاح میں “کریٹیکل منرلز” (اہم معدنیات) کہا جاتا ہے۔ ان میں تانبا (Copper)، لیتھیم (Lithium)، کوبالٹ (Cobalt)، نکل (Nickel)، اینٹیمنی (Antimony)، کرومائٹ (Chromite) اور نایاب زمینی عناصر (Rare Earth Elements) سرفہرست ہیں۔

عالمی توانائی ایجنسی (IEA) اور دیگر بین الاقوامی اداروں کی رپورٹس کے مطابق آئندہ دو دہائیوں میں ان معدنیات کی عالمی طلب میں کئی سو گنا اضافہ ہونے جا رہا ہے۔ بڑی عالمی طاقتیں، بالخصوص امریکہ، چین، یورپی یونین اور خلیجی ممالک، ان معدنیات کے محفوظ اور پائیدار ذرائع تک رسائی کے لیے سرگرم ہیں۔ ایسے عالمی ماحول میں پاکستان کا اپنے معدنی خزانوں کے ساتھ سامنے آنا نہ صرف ملکی معیشت کے لیے ایک سنہری موقع ہے بلکہ یہ پاکستان کی جغرافیائی و معاشی سفارت کاری (Geo-economics) کو بھی نئی بلندیوں پر لے جا سکتا ہے۔ پاکستان منرلز انویسٹمنٹ فورم 2026 کی افتتاحی تقریب میں وفاقی اور صوبائی قیادت کی یکجہتی نے غیر ملکی سرمایہ کاروں کو ایک انتہائی مثبت پیغام دیا۔ نائب وزیراعظم اور وزیر خارجہ اسحاق ڈار نے فورم کا باضابطہ افتتاح کرتے ہوئے ایک انتہائی اہم پالیسی بیان دیا کہ حکومت کی اولین ترجیح معدنی وسائل کو محض خام شکل میں برآمد کرنے کے بجائے ملک کے اندر ہی ان کی پروسیسنگ اور ریفائننگ کرنا ہے۔ ماضی میں خام مال سستے داموں برآمد کر کے اسی مال سے بنی مصنوعات مہنگے داموں درآمد کرنے کی روش نے ملکی معیشت کو شدید نقصان پہنچایا۔ مقامی سطح پر ریفائنریوں اور ویلیو ایڈیشن انڈسٹری کے قیام سے نہ صرف زرمبادلہ کے ذخائر میں کئی گنا اضافہ ہوگا بلکہ ملک میں صنعتی انقلاب برپا ہوگا اور لاکھوں نوجوانوں کے لیے روزگار کے نئے مواقع پیدا ہوں گے۔

اس موقع پر وفاقی وزیر خزانہ محمد اورنگزیب نے کان کنی کے شعبے کو ملکی معیشت کے لیے “گیم چینجر” قرار دیا، جبکہ وفاقی وزیر برائے پیٹرولیم علی پرویز ملک نے اس عزم کا اعادہ کیا کہ پاکستان کے معدنی ذخائر سے مؤثر استفادہ معاشی استحکام اور برآمدات میں اضافے کا سب سے بڑا ذریعہ بنے گا۔ پیٹرولیم ڈویژن کے جاری کردہ تخمینوں کے مطابق پاکستان کی معدنی برآمدات، جو 2025 میں 932 ملین ڈالر کے لگ بھگ تھیں، اصلاحات اور نئے منصوبوں کی تکمیل کے بعد 2039 تک 10.46 ارب ڈالر سالانہ تک پہنچ سکتی ہیں۔ یہ ہدف بظاہر بڑا ضرور ہے، لیکن اگر موجودہ رفتار برقرار رہی تو اس کا حصول ناممکن نہیں۔ اس فورم کی سب سے خوش آئند بات چاروں صوبوں، گلگت بلتستان اور آزاد کشمیر کی قیادت کی بھرپور شرکت ہے۔ اٹھارہویں آئینی ترمیم کے بعد معدنی وسائل پر صوبوں کا اختیار ایک مسلمہ حقیقت ہے، اور ماضی میں وفاق اور صوبوں کے درمیان ہم آہنگی کے فقدان کی وجہ سے کئی بڑے منصوبے التوا کا شکار رہے۔ تاہم، خصوصی سرمایہ کاری سہولت کونسل (SIFC) کے پلیٹ فارم نے وفاق، صوبوں اور عسکری قیادت کو ایک پیج پر لا کھڑا کیا ہے۔

بلوچستان، جو پاکستان کے کل رقبے کا تقریباً 44 فیصد ہے اور معدنی دولت کے لحاظ سے ملک کا امیر ترین صوبہ ہے، اس فورم کا مرکزِ نگاہ رہا۔ وزیراعلیٰ بلوچستان میر سرفراز بگٹی نے عالمی سرمایہ کاروں کو بھرپور اعتماد دلاتے ہوئے واضح کیا کہ صوبے میں سرمایہ کاری کے لیے سازگار ماحول اور مکمل سکیورٹی فراہم کی جائے گی۔ انہوں نے بجا طور پر اس نقطے کی نشاندہی کی کہ بلوچستان کا اصل مسئلہ سکیورٹی سے زیادہ “تاثر” (Perception) کا ہے، جسے حقیقت کے برعکس پیش کیا جاتا ہے۔ جسے حقیقت کے برعکس پیش کیا جاتا ہے۔ بلوچستان کے عوام ترقی اور خوشحالی چاہتے ہیں اور بیرونی سرمایہ کاروں کو خوش آمدید کہنے کے لیے تیار ہیں۔

بلوچستان میں دنیا کے سب سے بڑے تانبے اور سونے کے ذخائر میں سے ایک ریکوڈک (Reko Diq) منصوبہ اب عملی مرحلے میں داخل ہو چکا ہے، جس میں عالمی کمپنی بیرک گولڈ (Barrick Gold) کے ساتھ ساتھ سعودی عرب اور دیگر شراکت داروں کی دلچسپی نے دنیا بھر کے سرمایہ کاروں کا اعتماد بحال کیا ہے۔ ریکوڈک کے علاوہ سیندک (Saindak)، سیاہ ڈک (Siah Diq)، چاغی کے لوہے اور کرومائٹ کے ذخائر، اور لسبیلہ و خضدار کے معدنی علاقے عالمی سرمایہ کاری کے منتظر ہیں۔

اسی طرح وزیراعلیٰ گلگت بلتستان امجد حسین، وزیراعظم آزاد کشمیر افتخار گیلانی، گورنر خیبرپختونخوا فیصل کریم کنڈی، اور پنجاب و سندھ کے وزرائے اعلیٰ کی شرکت نے یہ واضح کر دیا کہ معدنی ترقی صرف بلوچستان تک محدود نہیں ہے۔ خیبرپختونخوا میں زمرد (Emerald)، کرومائٹ، ماربل اور گرینائٹ؛ گلگت بلتستان میں قیمتی پتھروں (Gemstones)، سونے اور لیتھیم؛ سندھ میں تھر کے کوئلے کے وسیع ذخائر؛ اور پنجاب میں نمک، جپسم، چونے کے پتھر، لوہے اور دریاؤں میں سونے کے ذرات کی دریافت نے پورے ملک کو معدنی نقشے پر نمایاں کر دیا ہے۔ کسی بھی ملک میں طویل المدتی غیر ملکی سرمایہ کاری اسی وقت آتی ہے جب سرمایہ کاروں کو پالیسیوں کا تسلسل، ٹیکسوں کا شفاف نظام، تنازعات کے حل کا مؤثر طریقہ کار اور منافع کی واپسی کی ضمانت حاصل ہو۔ فورم میں اس بات پر خصوصی زور دیا گیا کہ “پاکستان انویسٹمنٹ پالیسی” اور نیشنل منرلز ہارمونائزیشن فریم ورک کے تحت قوانین کو آسان اور عالمی معیار کے مطابق بنایا گیا ہے۔ پاکستان منرل ڈویلپمنٹ کارپوریشن (PMDC) اور آئل اینڈ گیس ڈویلپمنٹ کمپنی لمیٹڈ (OGDCL) جیسے اداروں کے تجربے کو جدید خطوط پر استوار کیا جا رہا ہے، جبکہ حالیہ دنوں میں 40 سے زائد نئے ایکسپلوریشن لائسنسز کا اجرا اس شعبے میں بڑھتی ہوئی سرگرمیوں کا عکاس ہے۔

تاہم، معدنی وسائل نکالنے کے عمل میں ماحولیاتی تحفظ (ESG) اور مقامی آبادی کی فلاح و بہبود (Community Impact) کو نظر انداز نہیں کیا جا سکتا۔ نائب وزیراعظم اسحاق ڈار اور فورم کے دیگر مقررین نے اس بات کا اعتراف کیا کہ معاشی ترقی اور ماحولیاتی تحفظ کو ساتھ لے کر چلنا ہوگا۔ کان کنی کے جدید طریقوں، پانی کے کم سے کم استعمال اور کاربن کے اخراج کو کنٹرول کرنے کے لیے عالمی ٹیکنالوجی کی منتقلی ناگزیر ہے۔ مزید برآں، مقامی آبادی کو اس ترقی کا براہِ راست حصہ دار بنانا ہوگا۔ جب بلوچستان، خیبرپختونخوا یا گلگت بلتستان کے مقامی شہریوں کو جدید تعلیم، صحت کی سہولیات، صاف پانی اور باعزت روزگار ملے گا، تبھی یہ منصوبے پائیدار ثابت ہوں گے اور مقامی سطح پر پائی جانے والی محرومیوں کا ازالہ ہو سکے گا۔ اگرچہ پاکستان منرلز انویسٹمنٹ فورم 2026 نے امید کے نئے چراغ روشن کیے ہیں، لیکن زمینی حقائق اور درپیش چیلنجز سے آنکھیں نہیں چرائی جا سکتیں۔ کان کنی کا شعبہ انتہائی سرمایہ طلب (Capital Intensive) اور طویل المدتی ہوتا ہے، جس میں کسی بھی کان کی دریافت سے لے کر پیداوار شروع ہونے تک کئی سال لگ جاتے ہیں۔ اس دوران سیاسی استحکام اور امن و امان کی صورتحال کو برقرار رکھنا سب سے بڑا امتحان ہوگا۔

دوسرا بڑا چیلنج بنیادی ڈھانچے (Infrastructure) کا ہے۔ چاغی، خضدار، وزیرستان یا گلگت بلتستان کے دور دراز پہاڑی علاقوں سے معدنیات نکال کر گوادر یا کراچی کی بندرگاہوں تک پہنچانے کے لیے جدید سڑکوں اور ریلوے نیٹ ورک کی تعمیر انتہائی ضروری ہے۔ حکومت کی جانب سے ریکوڈک اور دیگر منصوبوں کو بندرگاہوں سے جوڑنے کے لیے ریل اور روڈ لنکس کے منصوبے خوش آئند ہیں، لیکن ان پر تیز رفتار عملدرآمد وقت کی اہم ترین ضرورت ہے۔

تیسرا اہم پہلو ہنرمند افرادی قوت کی تیاری ہے۔ فورم کے تکنیکی سیشنز میں اس بات پر بھی غور کیا گیا کہ پاکستانی جامعات اور ووکیشنل اداروں کو جدید مائننگ انجینئرنگ، جیولوجی اور میٹلرجی کے شعبوں میں عالمی معیار کے مطابق ڈھالا جائے تاکہ غیر ملکی کمپنیوں کو مقامی سطح پر ماہر انجینئرز اور تکنیکی عملہ دستیاب ہو سکے، اور اس شعبے میں خواتین کی شمولیت کو بھی فروغ دیا جائے۔ پاکستان منرلز انویسٹمنٹ فورم 2026 محض ایک کانفرنس یا نمائش نہیں بلکہ پاکستان کی معاشی تاریخ کا ایک اہم سنگِ میل ہے۔ قدرت نے ہمیں وہ خزانے عطا کیے ہیں جو ہمارے تمام بیرونی قرضوں سے نجات دلانے اور پاکستان کو خطے کی ایک مضبوط معاشی طاقت بنانے کی مکمل صلاحیت رکھتے ہیں۔ ضرورت اس امر کی ہے کہ اس فورم میں ہونے والے معاہدوں، مفاہمت کی یادداشتوں اور عالمی سرمایہ کاروں کی دلچسپی کو سرخ فیتے کی نذر ہونے سے بچایا جائے۔ اگر وفاقی و صوبائی حکومتیں، ریاستی ادارے اور نجی شعبہ اسی عزم، شفافیت اور یکسوئی کے ساتھ آگے بڑھتے رہے، تو وہ دن دور نہیں جب پاکستان کی پہچان قرض لینے والے ملک کے بجائے دنیا کو توانائی اور جدید ٹیکنالوجی کے لیے قیمتی معدنیات فراہم کرنے والے ایک خوشحال اور خود مختار ملک کے طور پر ہوگی۔ پاکستان منرلز انویسٹمنٹ فورم کا باضابطہ افتتاح کے روز نائب وزیراعظم اور وزیر خارجہ اسحاق ڈار نے کیا۔ افتتاحی سیشن میں مختلف ممالک کے سفارت کار، عالمی مالیاتی اداروں اور کان کنی سے وابستہ بین الاقوامی کمپنیوں کے نمائندوں نے بھی شرکت کی۔ وفاقی وزیر برائے پیٹرولیم علی پرویز ملک، وزیر خزانہ محمد اورنگزیب، وزیراعظم آزاد کشمیر اور وزیراعلیٰ گلگت بلتستان، گورنر خیبرپختونخوا سمیت سندھ، پنجاب اور بلوچستان کے وزرائے اعلیٰ بھی افتتاحی تقریب میں شریک تھے۔یہ فورم حکومتِ پاکستان اور خصوصی سرمایہ کاری سہولت کونسل (ایس آئی ایف سی) کے اشتراک سے منعقد کیا جا رہا ہے۔ پاکستان منرلز انویسٹمنٹ فورم کی ویب سائٹ کے مطابق فورم کا مقصد پاکستان کو عالمی معدنیات اور کان کنی کی معاشی منڈیوں میں اہم مقام دلانا اور ملک کے وسیع معدنی وسائل کو پائیدار ترقی، معاشی تبدیلی اور عالمی سپلائی چین کے استحکام کے لیے بروئے کار لانا ہے۔فورم کی افتتاحی تقریب سے خطاب کرتے ہوئے اسحاق ڈار نے کہا کہ وزیراعظم شہباز شریف کا وژن ایک ایسی معیشت کا قیام ہے جو پیداواری صلاحیت، برآمدات اور سرمایہ کاری پر مبنی ہو۔ نائب وزیراعظم نے کہا کہ بلوچستان پاکستان کے معدنی مستقبل میں مرکزی اہمیت رکھتا ہے اور حکومت اس بات کے لیے پُرعزم ہے کہ صوبے کے قدرتی وسائل کی ترقی سے وہاں کی معیشت اور عوام کی فلاح و بہبود کو حقیقی فائدہ پہنچے۔اسحاق ڈار نے کہا کہ حکومت کا معدنیاتی ترقی کا منصوبہ صرف بلوچستان تک محدود نہیں بلکہ اس میں خیبر پختونخوا، معدنی وسائل سے مالا مال شمالی علاقوں، پنجاب اور سندھ کی صلاحیتوں سے استفادہ بھی شامل ہے ان کا کہنا تھا کہ حکومت کا مقصد محض معدنیات نکال کر خام شکل میں برآمد کرنا نہیں بلکہ بتدریج مقامی سطح پر پراسیسنگ، ریفائننگ اور ویلیو ایڈڈ صنعتی مصنوعات کی تیاری کی صلاحیت کو فروغ دینا ہے۔

فورم میں 60 سے زائد ممالک کی شرکت پاکستان کے معدنی وسائل میں بڑھتی ہوئی عالمی دلچسپی اور اس شعبے میں دیرپا شراکت داری قائم کرنے کے عزم پر اعتماد کی عکاسی کرتی ہے۔ پاکستان کے لیے نامزد امریکی سفیر نیٹلی بیکر نے پاکستان کو کاروبار اور سرمایہ کاری کے لیے بڑی منڈی قرار دیتے ہوئے کہا ہے کہ ملک میں اہم معدنیات اور کان کنی کے شعبے میں سرمایہ کاری کے وسیع مواقع موجود ہیں۔ نیٹلی بیکر نے پاکستان منرلز انویسٹمنٹ فورم کے زیرِاہتمام تیسرے سالانہ ایونٹ کے انعقاد کو خوش آئند قرار دیتے ہوئے کہا کہ اس فورم کا حجم گزشتہ سال کے مقابلے میں دگنا ہوا ہے۔ پاکستان عالمی سطح پر اپنی شناخت بنا رہا ہے اور یہ ملک کاروبار کے لیے ایک بڑی منڈی کے طور پر خود کو منوا رہا ہے۔ ان کے مطابق پاکستان میں اہم معدنیات اور کان کنی کے شعبے میں سرمایہ کاروں کے لیے وسیع مواقع موجود ہیں۔ نامزد امریکی سفیر نے انویسٹمنٹ فورم کے حوالے سے نیک خواہشات کا اظہار کرتے ہوئے امید ظاہر کی اس ایوںٹ کے ذریعے سرمایہ کاری کے حوالے سے اچھی خبریں اور اہم اعلانات سامنے آئیں گےوزیراعلیٰ پنجاب مریم نواز شریف نے تقریب سے خطاب کرتے ہوئے بتایا کہ گزشتہ ڈھائی برس کے دوران صوبائی محکمہ معدنیات سے حاصل ہونے والی آمدن بڑھ کر 40 ارب روپے ہو گئی ہے۔

انہوں نے کہا کہ پنجاب کے دریاؤں میں پلیسر گولڈ (دریائی ریت میں موجود سونے کے ذرات) کے ذخائر موجود ہیں اور ان کی مقدار کا تعین کرنے کے لیے سروے اور مطالعات کیے جا رہے ہیں,مریم نواز نے بتایا کہ چنیوٹ میں 26 کروڑ 15 لاکھ ٹن لوہے کے ذخائر موجود ہیں، جنہیں پراسیسنگ کے ذریعے اسٹیل میں تبدیل کیا جا سکتا ہے۔ انہوں نے گلابی نمک (پنک سالٹ) کی ویلیو ایڈیشن کو بھی آمدن میں اضافے کا ایک اہم ذریعہ قرار دیتے ہوئے کہا کہ اس شعبے میں مزید قدر افزائی سے زیادہ معاشی فوائد حاصل کیے جا سکتے ہیں۔

فورم سے آزاد کشمیر کے وزیراعظم، پنجاب، سندھ اور بلوچستان کے وزرائے اعلیٰ، گلگت بلتستان کے وزیراعلیٰ اور خیبر پختونخوا کے گورنر نے بھی خطاب کیا اور معدنی وسائل کی صلاحیت، سرمایہ کاروں کے لیے سہولتوں اور سرمایہ کاری کے مواقع پر روشنی ڈالی۔ وزیراعلیٰ بلوچستان سرفراز بگٹی کا کہنا تھا کہ صوبے میں معدنی راہداری کے تحفظ کے لیے ایک اور سکیورٹی ڈویژن قائم کیا گیا ہے تاکہ سرمایہ کاروں کو محفوظ ماحول فراہم کیا جا سکے۔