اسلام آباد (ڈیجیٹل پوسٹ) ڈی جی این سی سی آئی اے سید علی ناصر رضوی کا سینئر سرکل افسران کے ساتھ ہنگامی زوم اجلاس، کارکردگی بہتر بنانے کے لیے احکامات جاری

اسلام آباد (ڈیجیٹل پوسٹ) تفصیلات کے مطابق ڈائریکٹر جنرل نیشنل سائبر کرائم انویسٹی گیشن ایجنسی سید علی ناصر رضوی کی زیر صدارت این سی سی آئی اے ہیڈکوارٹر اسلام آباد میں تمام سینئر سرکل افسران کے ساتھ اہم اور ہنگامی زوم اجلاس کا انعقاد کیا گیا،اجلاس میں ملک بھر کے تمام سرکلز کی ماہانہ کارکردگی، زیر التوا مقدمات، عوامی شکایات اور جاری انکوائریوں کا تفصیلی اور سرکل وائز جائزہ لیا گیا۔ ڈی جی این سی سی آئی اے نے زیر التوا مقدمات اور شہریوں کی شکایات کے بروقت ازالے میں سست روی اور غفلت برتنے پر سخت اظہارِ تشویش کیا،ڈی جی این سی سی آئی اے نے تمام افسران کو سختی سے ہدایت کی کہ زیر التوا کیسز کو ترجیحی بنیادوں پر، شفافیت اور میرٹ پر جلد از جلد نمٹایا جائے۔ شہریوں کی شکایات پر فوری ایکشن لیا جائے اور انہیں انصاف کی فراہمی میں کسی قسم کی تاخیر نہ کی جائے،اس موقع پر ڈی جی این سی سی آئی اے سید علی ناصر رضوی نے واضح اور دو ٹوک الفاظ میں کہا کہ سائبر کرائم کا خاتمہ اور شہریوں کے جان و مال و عزت کا تحفظ این سی سی آئی اے کی اولین ترجیح ہے۔ فرائض کی انجام دہی میں کسی قسم کی غفلت، لاپرواہی، سستی اور کوتاہی ہرگز برداشت نہیں کی جائے گی۔ کارکردگی نہ دکھانے والے افسران کے خلاف محکمانہ کارروائی عمل میں لائی جائے گی،انہوں نے مزید ہدایت کی کہ سائبر فراڈ، مالیاتی فراڈ، سوشل میڈیا کے ذریعے بلیک میلنگ، ہراسمنٹ اور معصوم شہریوں کو ہراساں کرنے والے عناصر کے خلاف بلا امتیاز، سخت اور فوری کارروائیاں عمل میں لائی جائیں۔ جرائم پیشہ افراد کو قانون کی گرفت میں لا کر کیفر کردار تک پہنچایا جائے تاکہ متاثرہ شہریوں کو بروقت انصاف کی فراہمی اور عوام کے اعتماد کو بحال رکھا جا سکے