اسلام آباد (ڈیجیٹل پوسٹ) پیاس انٹرنیشنل کا اسلام آباد میں غیر قانونی شیشہ کیفیز کے خلاف فوری کارروائی کا مطالبہ

اسلام آباد (ڈیجیٹل پوسٹ): انسانی حقوق کے لیے کام کرنے والی مقامی تنظیم پیاس انٹرنیشنل نے وفاقی دارالحکومت میں بڑھتی ہوئی تعداد میں غیر قانونی شیشہ کیفیز کے خلاف فوری قانونی کارروائی کا مطالبہ کیا ہے، جنہیں وہ نہ صرف عوامی صحت کے لیے خطرہ بلکہ عدالتی احکامات کی کھلی خلاف ورزی قرار دے رہی ہے۔

تنظیم نے صدرِ مملکت، وزیرِ اعظم، سپریم کورٹ اور اسلام آباد ہائی کورٹ کے چیف جسٹس صاحبان، وزیرِ داخلہ اور اسلام آباد کی ضلعی انتظامیہ کے اعلیٰ حکام کو باضابطہ درخواست ارسال کی ہے، جس میں کہا گیا ہے کہ وفاقی دارالحکومت میں درجنوں شیشہ کیفے بغیر کسی لائسنس کے کام کر رہے ہیں اور بعض جگہوں پر مبینہ طور پر نشہ آور گولیاں اور ممنوعہ اشیاء نوجوانوں حتیٰ کہ کم عمر بچوں کو بھی فراہم کی جا رہی ہیں۔

پیاس انٹرنیشنل کے جنرل منیجر ایڈمن رانا تیمور نے کہا کہ “یہ شیشہ کیفے نہ صرف لائسنس کے بغیر کام کر رہے ہیں بلکہ کم عمر بچوں کو شیشہ فراہم کر کے ایک مضر صحت کلچر کو فروغ دے رہے ہیں جو کہ عوامی صحت و سلامتی کے لیے سنگین خطرہ ہے۔”

2005 میں قائم ہونے والی یہ غیر سرکاری تنظیم انسانی حقوق، بچوں سے جبری مشقت، منشیات کے استعمال، قیدیوں کے حقوق اور انسانی اسمگلنگ جیسے سماجی مسائل پر کام کرتی ہے۔ پیاس انٹرنیشنل کا کہنا ہے کہ یہ غیر قانونی شیشہ مراکز نہ صرف انسداد تمباکو نوشی اور غیر تمباکو نوش افراد کے تحفظ کا آرڈیننس 2002 کی خلاف ورزی کر رہے ہیں بلکہ اعلیٰ عدالتوں کے احکامات کی بھی توہین کر رہے ہیں۔

تنظیم نے واضح کیا کہ آئینِ پاکستان کا آرٹیکل 9، جو ہر شہری کو زندگی کے تحفظ کا حق دیتا ہے، ان غیر قانونی سرگرمیوں اور متعلقہ حکام کی خاموشی کے باعث متاثر ہو رہا ہے۔ سپریم کورٹ اور اسلام آباد ہائی کورٹ کئی بار قانون نافذ کرنے والے اداروں اور بلدیاتی حکام کو شیشہ کیفیز بند کرنے کے احکامات جاری کر چکی ہیں۔

درخواست کے اختتام پر تنظیم نے مطالبہ کیا کہ “ہم متعلقہ حکام سے مؤدبانہ گزارش کرتے ہیں کہ اسلام آباد میں تمام غیر قانونی شیشہ کیفیز کو عدالتی احکامات کی روشنی میں فوری طور پر سیل کر کے مستقل طور پر بند کیا جائے۔”

یاد رہے کہ شہری حلقے اور صحت کے ماہرین طویل عرصے سے شیشہ نوشی کے مضر اثرات، خصوصاً نوجوانوں پر، کے خلاف آواز بلند کرتے آ رہے ہیں اور عوامی مقامات پر انسداد تمباکو قوانین کے سخت نفاذ کا مطالبہ کر چکے ہیں۔